My Google Page Rank

Scorpio Wrestler - Mario

PDFPrintE-mail

Este si Mario Natividad Onrubia, 57 años de edad , tiene altor de 5’5” y residente de Bouganvilla drive , Guiwan Cuidad de Zamboanga . Conosido le tambien na nombre “Butch” . Su mayores si Jose Onrubia y Avelina Natividad. Su hermano y Hermana  si Jose , Arturo, Rodolfo, Leila y nora .El esposa si Erlind Adriatico Onrubia y diila mga anak si Marc Louie, Merlyn, Marell, y Marlou . Ya gradua le elementaria na Tetuan Central School , secondaria na  Zamboanga AE Colleges y colegio na Fort Bonifacio College na Manila.

“Cuando bata pa yo trambulicao mi pensamiento si cosa yo el juga.  Kay mi grandor y pesades quere yo juga baseball pero el problema hende yo puede core como el mga otro ta core, mas malo ya na basketball kay core pa, kabar ay bringca pa. Un dia alyi kame na Guiwan de cuento cuento lang este un weightlifter ya introduci este juego de alsada de yero, el nombre disuyu si Antonio Solon. Ya liba le conmigo man practice alya na casa di canda Jolly Hipolito, kay el tata di Jolly un barbelista tambien de antes. El ta alsa kame alyi barbel de cemento  lang.  Ya lega el tiempo na 2nd year high school yo, Edad mio 15 años ya liba conmigo si Tony para alya na Bucoy gym con lolo Fabian, alyi ya principia el dimio serioso training y alegre yo juga con este juego kay hende yo core mas y hende yo bringca pa. Na mi pensamiento amo ya este el ta busca yo, pa mafuersa kita .Aki ara cuanto años ya pasa ya queda ya yo incluhido na line up del Zamboanga Team. Ta juga yo na light weight division. El mi coach si lolo Fabian Bucoy ele gayod ya ase entende conmigo cosa el guarantia si queda ya champion pati cosa yo puede usa coneste juego na mi futuro. Si coach Nick Suarez ele el un ejemplo de persona ta dale mira el buen diciplina, costumbre debe el un atleta tiene y ta ase le pasensya ayuda conmigo na practice na hora mio. Yan Gold medal yo na Palarong Pambansa 1978-82 ,  ese el honor del team Zamboanga hasta ahora ta continua pa. Antes tan practice yo estudia pa y working student pa iyo, cuando ya entra yo  para man soldao na Philippine Army y juga weightlifting onde onde kame lugar el ta anda para juga. Alegre pero cansao porcaosa con el grupo, dol nuay kame problema na  vida. 28 años  mi edad ya combida conmigo si Msgt Enrique Rapisona del Phil. Army para pruba juga wrestling. Primero alang alang yo,  ya ase le entende conmigo ,chene yo bentaha kay mafuersa ya yo daan,antes yero tu ta alsa , aki hente ya tu el alsa y pichi ,el discarte ya lang,  mga pichida, paquemodo el sakada del resuello,position del cuerpo pati condicion dituyu  salud el mas importante. Ya acepta yo y ya queda yo miembro del wrestling team del Phil. Army y si msgt el team leader .Ta juga yo na 82 kilo gram free style. Ya puede yo gana Gold Medal na torneo del Greco Roman Wrestling y Olympic games del PNP, AFP. Ta rindi yo gracias tambien con Capt Amarille del Phil. Army kay ele ya suporta conmigo y ya guia para continua el mio ambicion. Ya retira ya yo pagka soldao del 2011. Desde ya retira yo na servicio hasta ahora ta inciña pa yo siempre con el mio mga  estudiante na wrestling aki na diamon compound na Guiwan kay nuay pa el Grandstand.  Este mayo 1 el  insiña tambien yo wrestling na Summer Learn to Play Program Di Mayor Beng Climaco.Si quen interesao anda lang na Sports Office allyi na City Coliseum, Tetuan para puede registra. Libre lang este . Debe kita alegre na cosa kita ta ase , pone confiansa na diaton kuerpo . y no ulvida resa."  (By Elong Natividad)




Related news items:
Newer news items:
Older news items: