My Google Page Rank

Determinacion di Joseph

PDFPrintE-mail

Este si Joseph Aaron De los Santos Romarate, 34 año el edad, 6’2” el altor, conosido como si “Seph”, residente de Tetuan, Cuidad de Zamboanga. Su mayores si Carlos Tabancura Romarate y Carolina Bautista De Los Santos.      Su hermano y hermana si Bambi, Raquel, Carla, Sarah y Carlos Jr. Su esposa  si Maeshayne Delena Romarate, diila anak si Shawn Joseph y Laneah Jeyne.

Ya gradua le elementaria na Tetuan central School, secondaria na Immaculate Conception Archdiocesan School (ICAS), colegio na Ateneo De Zamboanga University y ST Francis of Assisi. Presente ta trabaja le na banko PNB y Head coach de ADZU na colegio basketball varsity team.

Este su storya.

"Ya principia yo juga basketball bata pa yo alyi na Mormon drive junto con mi mga primo mga señelos familia, sila grande ya pureso hende yo ta puede gana contra canila y ta usa pa sila mga mobida ta sinti yo duele, kabar ganguia pa conmigo. Este cosa que ya pone yo na mi pensamiento era queda mas grande para puede tambien yo gana conta canila. Mi primero coach si Charlie Basilio cuando ya tiene Liga na  escuela de Tetuan y si Joseph Solamillo. El mga otro mga coaches el ya aprende yo si Onei Gallo ,ele el ya inciña el poste meñada, si Ednie Morones el puersa defensa, si Datu Shalim el para pone confiansa na juego , si Elong Natividad el puersa y valienterias, si Pedro Alfaro el sistema juego de basketball. Pero grande gayod ayuda el ya ase conmigo para queda un player si Rejhi Natividad kay ele el persona ya conbinsi para man try out yo na senior varsity na Ateneo cuando ya kaba yo gradua na high school.  Abla le cre tu kay tu bueno juga y un player tu, ya queda yo varsity del ateneo y alyi doble mio practice aga y denoche, hende yo tan absent kay ta cre yo cosa yo ta ase na practice amo tambien el ase durante el juego.Bien alegre yo juga basketball kay con ancias pirmi, mucho sacrificio ta ase y necesita prepara el cuerpo na bangaan pati amo este el famoso desportes na Pilipinas.  El contodo  dificil na mi istoria na basketball cuando ta juga yo na manila alyi na St Francis of Assisi, yo lang solo, primera vez yo hende junto con mi mayores,  palta mi alegria. Mi acomplicimiento como player, primero grande award MVP 2003 entriay  escuela torneo, kame el Champion ese tiempo. MVP 1st Ben Go basketball torneo, mga otro awards ya ricibi yo Best rebounder, Mythical Five na mucho liga na ciudad, el mga teams ya juga yo Adzu, Weesam, MLozano, Barangay Tetuan, el mga luger ya puede yo anda juga nacional Prisaa na Pampanga City, ta representa kame region IX . Mindanao Friendship na LanaoCity, Cagayan de Oro City, Mati y Davao junto cun coach Elong Natividad, Ednie Morones  y Bobibick De Los Santos. Ya juga tambien yo na Kota kinabalu, Malaysia para del team SRI Samshinar. El coaching istoria mio un grande cosas tambien que ya puede yo ase , 2005 Milo Passarelle team yan champion aqui na Zamboanga City y ya gana kame el Mindanao elimination na Cagayan de Oro City. Aguel el primera vez ya gana el Zamboanga City na torneo del Milo promotion. 3rd place na Nacional torneo.  Ya puede tambien yo recibi mga  awards  como best coach na commercial Liga alyi na Golden Boys gym. Mi otro alegria apuera el basketball, el quidada de pescao mga goldfish.

Este yo puede abla como un coach . maskin onde manda con ustedes juga, dale cosa el sabe y no ulvida respeta na de ustedes  mga coaches, nomas queda hambuguero nomas man pa sabe todo, kay kita puede pa aprende mga nuevo inciñada del otro coach. Acorda tambien kita kay chene Dios. Pidi kita el guia para hende kita entra na mal biscio, yo nungca el ase parte na mio juego el tomada y pumada del cigarilio , hende se el ayuda canaton para na diaton salud. Pabor aguellos tan coach ya, ase pa siempre parte na ejercisio de ustedes juga basketball… Kay ta ama quita coneste Juego."  (By Elong Natividad)




Related news items:
Newer news items:
Older news items: